മനുഷ്യത്വവിരുദ്ധ ഉപരോധവും ആക്രമണങ്ങളും കാരണം ഗസ്സയിലെ ജനങ്ങള്‍ വിശന്നുവലയുകയാണ്. ഭക്ഷണവും മരുന്നും ഇന്ധനവും പോലും നിഷേധിക്കപ്പെടുമ്പോള്‍, പ്രതീക്ഷയായി ഈജിപ്തില്‍ നിന്ന് കുറെ മനുഷ്യര്‍ കടല്‍ വഴി ഭക്ഷണം എത്തിക്കാനുള്ള വ്യത്യസ്ത സംരംഭവുമായി എത്തിയിരിക്കുന്നു.
വലിയ മാനുഷിക ദുരന്തങ്ങളിലൊന്നാണ് ഇപ്പോള്‍ ഗസ്സയില്‍ അരങ്ങേറുന്നത്. വ്യാപകമായ അക്രമം, നാടുകടത്തല്‍ എന്നിവക്ക് ശേഷം മനുഷ്യരെ പട്ടിണിക്കിട്ട് കൊല്ലുക എന്ന ഒളി അജണ്ടയാണ് ഗസ്സയില്‍ നടപ്പിലാക്കി വരുന്നത്. ഒരത്ഭുത ജനതയുടെ അതിജീവനപോരാട്ടത്തിനാണ് ഇന്ന് ലോകം സാക്ഷ്യം വഹിക്കുന്നത് എന്ന് ഉറപ്പിച്ചു പറയാം.
ഇസ്രായീലിന്റെ മനുഷ്യത്വവിരുദ്ധമായ ഉപരോധവും തുടര്‍ച്ചയായ ആക്രമണങ്ങളും കാരണം, ഗസ്സയിലെ ജനങ്ങള്‍ കടുത്ത പട്ടിണിയിലേക്കും ദാരിദ്ര്യത്തിലേക്കും തള്ളിവിടപ്പെട്ടിരിക്കുന്നു. ഭക്ഷണം, മരുന്ന്, ഇന്ധനം തുടങ്ങിയ അടിസ്ഥാന ആവശ്യങ്ങള്‍ പോലും നിഷേധിക്കപ്പെടുന്ന ഈ സാഹചര്യത്തില്‍, ഗസ്സയുടെ അതിജീവന പോരാട്ടം മാനുഷികതയുടെ അവസാന വാക്കാണ്.
ഈ ദുരിതമുഖത്ത്, പ്രതീക്ഷയുടെ കിരണമായി ഈജിപ്തില്‍ നിന്ന് ചില മനുഷ്യര്‍ കടല്‍മാര്‍ഗ്ഗം ഭക്ഷണം എത്തിക്കാനുള്ള നൂതനമായ സംരംഭവുമായി മുന്നോട്ട് വന്നിരിക്കുന്ന വാര്‍ത്തയാണ് ഈ ആഴ്ചത്തെ ഹൈലൈറ്റ്. 'പ്രതീക്ഷയുടെ കുപ്പികള്‍' എന്ന് മനുഷ്യാവകാശ പ്രവര്‍ത്തകര്‍ വിളിക്കുന്ന ധാന്യക്കുപ്പികള്‍ വഴിയാണ് ഈ ഐക്യദാര്‍ഢ്യം.
'കടലില്‍ നിന്നുള്ള ഉപരോധം തകര്‍ക്കുന്നു' എന്ന ടാഗില്‍ 'ന്യൂസ്‌റൂം.കോം' പോലുള്ള മാധ്യമങ്ങള്‍ എടുത്തു കാണിച്ച ഈ സംരംഭം, ഗസ്സയിലേക്ക് പരമ്പരാഗത മാര്‍ഗ്ഗങ്ങളിലൂടെ സഹായം എത്തിക്കുന്നത് പോലും തടയപ്പെടുന്ന സാഹചര്യത്തില്‍, ബദല്‍ മാര്‍ഗ്ഗം കണ്ടെത്താനുള്ള ജനകീയ ശ്രമമാണ്.
'സയണിസ്റ്റ് ശത്രു' എല്ലാ വഴികളും അടയ്ക്കുമ്പോള്‍, ഈജിപ്തുകാര്‍ തങ്ങളുടെ തനതായ രീതിയില്‍ ഗസ്സയിലെ ജനങ്ങള്‍ക്ക് ആശ്വാസം എത്തിക്കാന്‍ ശ്രമിക്കുന്നു. ഇതിനായി ഉപയോഗിക്കുന്നത് ലളിതയ മാര്‍ഗങ്ങളാണ്.
വൃത്തിയുള്ളതും വായു കടക്കാത്തതുമായ പ്ലാസ്റ്റിക് കുപ്പികളില്‍ ഉണങ്ങിയ ഭക്ഷണസാധനങ്ങളായ അരി, പരിപ്പ്, പയര്‍, ബര്‍ഗര്‍ എന്നിവ നിറയ്ക്കുന്നു. പിന്നീട് ഈ കുപ്പികള്‍ ഗസ്സ തീരത്തേക്ക് ഒഴുകിയെത്താന്‍ സാധ്യതയുള്ള ഈജിപ്തിലെ വടക്കന്‍ സിനായിലെ അല്‍ അരിഷ്, ശൈഖ് സുവൈദ്, റഫ തുടങ്ങിയ സ്ഥലങ്ങളില്‍ നിന്ന് കടലിലേക്ക് എറിയുന്നു.
ഈ കുപ്പികള്‍ ഗസ്സയിലേക്ക് എത്തിച്ചേരുമോ എന്നതിലുപരി, സഹായം നല്‍കാന്‍ ആഗ്രഹിക്കുന്നവരുടെ വിശാല മനസ്സിന്റെയും ആഗ്രഹത്തിന്റെയും പ്രതിഫലനമാണ് ഈ സംരംഭം. കുപ്പികളില്‍ 'ഗസ്സയിലെ ജനങ്ങള്‍ക്കുള്ള സമ്മാനം- ഭക്ഷണം' എന്ന് വ്യക്തമായി രേഖപ്പെടുത്തുന്നു. ഓരോ കുപ്പിയും, എത്തുമോ ഇല്ലയോ എന്ന് അവര്‍ക്ക് ഉറപ്പില്ലെങ്കിലും, മാനുഷിക ഐക്യദാര്‍ഢ്യത്തിന്റെ വലിയ പ്രഖ്യാപനമാണ്.
സര്‍വോപരി, പട്ടിണിക്കിടല്‍ ഉള്‍പ്പെടെ കൊടിയ ക്രൂരതകള്‍ക്കെതിരെ മൗനം പാലിക്കുന്ന മുഖ്യധാര രാജ്യങ്ങളുടെ നിലപാടുകളോടുള്ള ജനകീയ വിചാരണയാണ് ഈ സ്‌നേഹക്കുപ്പികള്‍. ഈജിപ്തിലെ തീരപ്രദേശങ്ങളായ ഡാമിയേറ്റ, പോര്‍ട്ട് സയീദ്, കഫര്‍ അശ്ശൈഖ്, അലക്‌സാണ്ട്രിയ, ബെഹൈറ, സൂയസ് എന്നിവിടങ്ങളിലെ ജനങ്ങളെയും ഈ സംരംഭത്തില്‍ പങ്കുചേരാന്‍ ആഹ്വാനം ചെയ്യുന്നു.
ഉപരോധം തകര്‍ക്കാന്‍ കഴിഞ്ഞില്ലെങ്കിലും, നിശ്ശബ്ദതയെ തകര്‍ക്കാന്‍ കഴിയുമെന്നും ഗസ്സ ഈ ശ്രമത്തിന് അര്‍ഹമാണെന്നും സാധാരണക്കാരായ ഈ ജനങ്ങള്‍ വിശ്വസിക്കുന്നു.
ഗസ്സ: ദുരന്തഭൂമി
മാധ്യമപ്രവര്‍ത്തകന്‍ അഹമ്മദ് റഫ്അത്ത് ഗസ്സയിലെ സാഹചര്യത്തെ 'സങ്കീര്‍ണ്ണമായ ദുരന്തം' എന്നാണ് വിശേഷിപ്പിച്ചത്. ബോംബാക്രമണങ്ങള്‍ക്കപ്പുറം പട്ടിണി മരണങ്ങളും അവിടെ വര്‍ധിച്ചുവരുന്നു. ലോകരാജ്യങ്ങള്‍ -അറബ് രാജ്യങ്ങളടക്കം- ഈ ദുരന്തത്തിന് മുന്നില്‍ നിസ്സഹായരായി കാഴ്ചക്കാരായി നില്‍ക്കുന്ന അവസ്ഥയാണ്്.
ഇസ്രായീല്‍ അധിനിവേശത്തിനെതിരെ ശക്തമായ ജനകീയ പ്രതിഷേധങ്ങള്‍ ലോകമെമ്പാടുമുയരുമ്പോഴും, ഔദ്യോഗിക തലത്തില്‍ കാര്യമായ നീക്കങ്ങളൊന്നും നടക്കുന്നില്ലെന്ന് റഫ്അത്ത് ചൂണ്ടിക്കാട്ടുന്നു. 'ഡോക്ടേഴ്‌സ് വിത്തൗട്ട് ബോര്‍ഡേഴ്‌സ്', ആംനസ്റ്റി ഇന്റര്‍നാഷനല്‍ ഉള്‍പ്പെടെ നൂറിലധികം സിവില്‍ സംഘടനകള്‍ ഇസ്രായീലിന്റെ തുടര്‍ച്ചയായ അതിക്രമങ്ങളെ അപലപിച്ചു രംഗത്തുവന്നിട്ടുണ്ട്.
വെസ്റ്റ് ബാങ്കില്‍ പരമാധികാരം അടിച്ചേല്‍പ്പിക്കാനുള്ള ഇസ്രായീലി 'നെസറ്റിന്റെ' തീരുമാനത്തെയും അദ്ദേഹം നിശിതമായി വിമര്‍ശിച്ചു. തെരഞ്ഞെടുക്കപ്പെട്ട പാര്‍ലമെന്റ് എടുത്ത ഈ തീരുമാനം, ഇസ്രായീലിന്റെ അധിനിവേശം കൂടുതല്‍ ശക്തമാക്കാന്‍ ഭാവിയില്‍ ഉപയോഗിക്കപ്പെടാവുന്ന 'തന്ത്രപരമായ അപകടം' ആണെന്നും അദ്ദേഹം കൂട്ടിച്ചേര്‍ത്തു. സാധാരണക്കാരെ പട്ടിണിക്കിടുന്നത് വിമാനങ്ങളെയും ടാങ്കുകളെയുംകാള്‍ അപകടകരമായ ആയുധമായി മാറിയിരിക്കുകയാണെന്നും അദ്ദേഹം പറഞ്ഞു.
ഗസ്സയിലെ ജനങ്ങള്‍ ഒറ്റയ്ക്കല്ലെന്ന് ലോകത്തെ ഓര്‍മ്മിപ്പിക്കുന്നതില്‍ ഇത്തരം ചെറിയ ശ്രമങ്ങള്‍ പോലും വലിയ പ്രാധാന്യം അര്‍ഹിക്കുന്നു. കടലിലൂടെ ഒഴുകി നീങ്ങുന്ന ഓരോ കുപ്പിയും, മാനുഷികതയുടെ പ്രകാശഗോപുരമായി ഗസ്സയുടെ അതിജീവന പോരാട്ടത്തിന് കരുത്ത് പകരും.
അതിജീവനത്തിന്റെ ഈ പുതിയ ആഖ്യാനം പുത്തന്‍ തലമുറയുടെ പ്രതികരണമാണ്. ഭീകരമായ സാഹചര്യങ്ങളെ ഫലസ്തീന്‍ ജനത നേരിടുന്നത് അസാധാരണമായ ധീരതയോടെയാണ്. വേദനയില്‍ നിലവിളിക്കുമ്പോഴും, അടുത്ത നിമിഷം തന്നെ അതിജീവനത്തിന്റെയും നിശ്ചയദാര്‍ഢ്യത്തിന്റെയും സന്ദേശങ്ങള്‍ ലോകത്തിന് നല്‍കുന്ന ഫലസ്തീനികള്‍ 'ഇതിഹാസ ജനത'യാണെന്നാണ് റഫ്അത്ത് പറയുന്നത്.
ദയയില്ലാത്ത അക്രമിയുടെ ആക്രമണ യന്ത്രങ്ങള്‍ക്കെതിരെ അവര്‍ നടത്തുന്ന പോരാട്ടം ചരിത്രത്തില്‍ സമാനതകളില്ലാത്തതാണ്. മുന്‍പ് ഗസ്സയിലേക്ക് പോയ 'മാഡ്‌ലിന്‍' കപ്പലിനെ ഇസ്രായേല്‍ തടഞ്ഞതിനെ 'കുറ്റവാളി സര്‍ക്കാരിന്റെ വ്യക്തമായ കടല്‍ക്കൊള്ള' എന്നാണ് റഫ്അത്ത് വിശേഷിപ്പിച്ചത്. ഈ സംഭവം ഗസ്സയിലെ മാനുഷിക പ്രതിസന്ധിയുടെ ആഴം വെളിപ്പെടുത്തി.
ഭക്ഷണത്തിനും മരുന്നിനും ഇന്ധനത്തിനും വേണ്ടി നെട്ടോട്ടമോടുന്ന ജനങ്ങളുടെ ദയനീയ ചിത്രം ലോക മാധ്യമങ്ങള്‍ വരച്ചുകാട്ടി. ഭക്ഷണം വിതരണം ചെയ്യുന്ന കേന്ദ്രങ്ങളില്‍ നിന്ന് ആഹാരം വാങ്ങാന്‍ ശ്രമിക്കുന്നതിനിടെ ഡസന്‍ കണക്കിന് ആളുകള്‍ കൊല്ലപ്പെട്ട സംഭവങ്ങള്‍, 'ഉപജീവനത്തിന്റെ രക്തസാക്ഷികള്‍' എന്ന ഭയാനകമായ വാക്കിനു തന്നെ ജന്മം നല്‍കി.
ഗസ്സയിലെ ജനങ്ങള്‍ ഒറ്റയ്ക്കല്ലെന്ന് ലോകത്തെ ഓര്‍മ്മിപ്പിക്കുന്നതില്‍ ഇത്തരം ചെറിയ ശ്രമങ്ങള്‍ പോലും വലിയ പ്രാധാന്യം അര്‍ഹിക്കുന്നു. കടലിലൂടെ ഒഴുകി നീങ്ങുന്ന ഓരോ കുപ്പിയും, മാനുഷികതയുടെ പ്രകാശഗോപുരമായി, ജനതയുടെ അതിജീവന പോരാട്ടത്തിന് കരുത്ത് പകരും, സത്യം.